به گزارش ایراف، عبدالسلام جواد، سخنگوی این وزارتخانه گفت که از این میان افغانستان 8 میلیون دلار به تاجیکستان صادرات داشته و ۲۲ میلیون دلار نیز واردات کرده است.
سخنگوی وزارت صنعت و تجارت طالبان گفت: تجارت افغانستان با کشور تاجیکستان در هفت ماه سال ۲۰۲۴ میلادی، در حدود ۳۰ میلیون دلار بوده که ۸ میلیون دلار صادرات و ۲۲ میلیون دیگر واردات است.
به تازگی دولت تاجیکستان تصمیم گرفته است که راه‌آهن کشورش را تا مرز افغانستان امتداد بدهد.
اتاق صنایع و معادن افغانستان بر توسعه بیش‌تر همکاری‌های بازرگانی و ترانزیتی میان افغانستان و تاجیکستان تاکید می‌ورزد و می‌افزاید: در صورتی‌که راه‌آهن میان افغانستان و تاجیکستان وصل شود اقتصاد هر دو کشور رشد چشمگیری خواهد داشت.
سخی احمد پیمان، معاون نخست اتاق صنایع و معادن طالبان گفت: از اینکه تاجیکستان کشور هم‌مرز و همسایه افغانستان است ما می‌توانیم که توسعه تجاری خود را با آن افزایش دهیم خصوصا کالاهای صنعتی افغانستان در تاجیکستان بازار خوبی دارد و راه‌های ترانزیتی راه‌آهن است از طریق افغانستان به تاجیکستان و پاکستان هم برای تاجیکستان مفید است هم برای افغانستان.
با توجه به وضعیت جاری میان افغانستان و تاجیکستان، برخی از آگاهان مسایل اقتصادی موقعیت افغانستان را برای توسعه تجارت و ترانزیت میان کشورهای همسایه و منطقه بسیار با ارزش می‌دانند.
بر اساس گزارش رسانه‌های تاجیکستان، درازای راه‌آهنی که تا مرز افغانستان امتداد می‌یابد، ۵۱ کیلومتر است و با تکمیل شدن آن تاجیکستان به بازارهای افغانستان ، پاکستان و هند راه پیدا خواهد کرد.
هزینه‌ی این پروژه چهار میلیون دلار گفته شده و در جریان سه سال تکمیل خواهد شد.
گفته می‌شود که ساخت این راه‌آهن یک بخش از پروژه بزرگی بنام “تات” است که بر بنیاد آن افغانستان، تاجیکستان و ترکمنستان از طریق راه‌آهن با دیگر کشورهای آسیای میانه وصل می‌شود.
