به گزارش ایراف، امامعلی رحمان، رئیس جمهور تاجیکستان در سخنرانی خود در هفتاد و نهمین نشست مجمع عمومی سازمان مال گفت که از ایجاد صلح، ثبات پایدار و توسعه اقتصادی و اجتماعی در افغانستان حمایت می‌کند.
او همچنین در این سخنرانی خواستار حمایت جهان از افغانستان برای جلوگیری از بحران انسانی در این کشور شد.
او افزود که جهان نباید تلاش‌هایش در جهت کمک به مردم افغانستان را دریغ کند.
این درحالی است که از زمان بازگشت طالبان در میان کشورهای آسیای مرکزی، تاجیکستان تنها کشوری است که روابط خصمانه‌تری با طالبان دارد.
دوشنبه به طور سنتی و تاریخی از مخالفان طالبان و حامیان ضد این گروه بوده است.
پس از تسلط دوباره طالبان شماری از چهره‌های ضد طالبانی، افغانستان را ترک کرده و به تاجیکستان پناه بردند که بر اساس اطلاعات، در حال حاضر نیز شماری از اعضای «جبهه مقاومت ملی» در تاجیکستان به سر می‌برند.
با این حال، گزارش‌هایی اخیرا مبنی بر سفر رئیس اداره اطلاعات تاجیکستان به کابل منتشر شده است.
گفته می‌شود این سفر مقام اطلاعاتی تاجیکستان به خواست امامعلی رحمان، رییس جمهور آن کشور به افغانستان صورت گرفته و او پس از بازگشت به دوشنبه، این سفر را «پردستاورد» عنوان کرده است.
اگرچه مقام‌های کابل و دوشنبه نخواسته‌اند این سفر یتیموف رسانه‌ای شود؛ اما برخی رسانه‌ها به نقل از منابع نامشخص از کابل گزارش داده‌اند که سفر این مقام تاجیکستان چند روز طول کشیده است.
منابع به رسانه‌ها گفته‌اند که تاجیکستان می‌خواهد روابط خود با افغانستان را گسترش دهد؛ در حالی که پیش از این مقام‌های این کشور به شمول رییس جمهور و وزیر کشور، بارها از سیاست طالبان در قبال کشورها سخت انتقاد کرده و آن را خلاف روابط بین‌الملل عنوان نموده‌اند.
